बुलढाणा (हॅलो बुलडाणा) वाचकांनो हौसेला मोल नसतं.. हे समजून घ्या! गोष्ट माणसाची असो वा प्राण्यांची ! शेतकऱ्यांच्या जीवनात कुठलाही पाळलेला प्राणी हा अत्यंत प्रेमाचा आणि महत्त्वाचा भाग असतो. मग तो गाय असो की बैल त्यामुळे शेतकरी आपल्या पाळलेल्या बैलाला असू देत किंवा गाईला मोठ्या प्रमाणात जीवापाड प्रेम करत असतो. याचा प्रत्यय आलाय बुलढाणा जिल्ह्यातील देऊळगाव माळी या गावात ! शेतक ऱ्याने चक्क गायीचं डोहळे जेवण घातलं!
तुळशी विवाह नंतर आता लग्न समारंभाला सुरुवात झाली आहे. लग्न सोहळा म्हणजे दोन घराण्यासाठी जीवनभर लक्षात राहावा असा आनंदोत्सव, दोन युवांची जन्माची गाठ,जन्मजन्मांतराचे नाते. त्यानंतर या जोडप्याकडून येणाऱ्या ‘गुड न्यूज’ सासर, माहेरच्या मंडळीसह नातेवाईक, मित्र मंडळी यांच्याकडून आतुर प्रतीक्षा राहते.
जवळच्या सोयऱ्यांना ही शुभ बातमी लवकर कळते.मात्र दुरच्यांना, गावकरी, वस्ती, सदनिका( अपार्टमेंट) मधील रहिवासी, शेजाऱ्या पाजाऱ्यांना मिळते, त्यावर शिक्कामोर्तब होते ते ‘डोहाळे जेवण’ या सभारंभाने! साधारणतः गर्भवतीच्या सातव्या महिन्यात हा सोहळा पार पडतो. हौशी सासरची मंडळी मोठ्या थाटात हा सोहळा साजरा करतात. आता डोहाळ जेवण म्हणजे यात नवल काय ? असे वाचकांना, व्ह्यूवर्स ला वाटणे स्वाभाविक आहे.
मात्र हे डोहाळ पुराण सांगायचे कारण म्हणजे बुलढाणा जिल्ह्यात एक खास डोहाळ जेवणाचा सभारंभ पार पडला.आता तुम्ही म्हणाल यात काय विशेष? मंडळी थोडा तर धीर धरा…, हे डोहाळ जेवण एखाद्या युवतीचे, महिलेचे नसून एका गोमातेचे अर्थात गाईचे आहे.विश्वास बसणार नाही पण हे वास्तव आहे. मेहकर तालुक्यातील देऊळगाव माळी या गावातील मगर परिवाराने हा अभूतपूर्व सोहळा आयोजित केला होता.आपण प्राणीमात्रावर दया करायला हवी, त्यांना माणसाप्रमाणे जीव लावायला हवा, जिवापाड जपायला हवं! असं फक्त म्हणतच असतो किंवा फक्त ते पुस्तकातच राहतं. परंतु देऊळगाव माळी तालुका मेहकर येथील मगर परिवाराने हे प्रत्यक्षात उतरवले आहे. असेच डोहाळे जेवण मगर परिवाराने चक्क गोमातेचे केले. जिल्ह्यातील हे पहिले आगळेवेगळे डोहाळे जेवण ठरले आहे. आपल्या अतिशय लाडाच्या गाईवर मगर परिवाराचे अगदी आपल्या कुटुंबीयातील सदस्य प्रमाणे प्रेम आहे. त्यामुळे ती आई होणार या गुड न्यूज ने अख्ख्या मगर परिवाराला आनंद झाला. त्यांनी या गोमातेचे अतिशय उत्साहात व आनंदात डोहाळे जेवण केले. परिसरातील शेतकरी, माता-भगिनी यांना बोलावून गोमातेचे डोहाळे जेवण करून मुक्या प्राण्यांवर सुद्धा आपण माणसाप्रमाणे प्रेम करावे. त्यांना सुद्धा माणसाप्रमाणे वागणूक द्यावी. अशा प्रकारचे आदर्श उत्तम उदाहरण पांडुरंग तुळशीदास मगर, वसंता मगर, गणेश मगर, व मगर परिवाराने समस्त जनतेला दिले आहे. पाळणा, पुष्पहाराची सजावट ओटीभरण, आणि मिष्टान्न जेवण असे सर्व विधी करण्यात आले.
त्यांच्या या उपक्रमाचे कौतुक आणि खमंग चर्चा संपूर्ण मेहकर तालुक्यात होत आहे.
