बुलढाणा (हॅलो बुलढाणा) वीज बिलाच्या थकबाकीमुळे कायमस्वरूपी वीज पुरवठा खंडित असलेल्या जिल्ह्यातील घरगुती,व्यावसायिक आणि औद्योगिक वर्गवारीतील १ लाख ७१४ ग्राहकांना महावितरण अभय योजना २०२४ मध्ये सहभागी होऊन थकबाकीमुक्त होण्याची संधी उपलब्ध झालेली आहे. थकबाकीदार ग्राहकांनी थकबाकीची ८२ कोटी २९ लाख रूपयाची मुद्दल रक्कम भरल्यास थकबाकीवरील व्याज आणि विलंब आकाराचे एकूण १२ कोटी रुपये माफ होणार आहे.
मा.सर्वोच्च न्यायालयाने दिलेल्या निकालानुसार कोणत्याही जागेच्या मालक किंवा खरेदीदार किंवा ताबेदार यांनी वीजबिलाची थकबाकी रक्कम भरणे बंधनकारक आहे. तथापि, थेट कायदेशीर कारवाई करण्याच्या ऐवजी ग्राहकांना एक संधी म्हणून सवलतीची योजना लागू केली आहे. महावितरणचे व्यवस्थापकीय संचालक श्री.लोकेशचंद्र यांनी मा. उपमुख्यमंत्री तथा ऊर्जामंत्री देवेंद्र फडणवीस यांच्या सूचनेनुसार ग्राहकांना दिलासा देण्यासाठी १ सप्टेंबरपासून ही योजना राज्यात लागू करण्यात आली आहे.
▪️योजना आणि योजनेचा कालावधी..
राज्यात ३१ मार्च २०२४ पर्यंत थकीत बिलामुळे कायमस्वरुपी वीज पुरवठा खंडित झालेल्या (पीडी) घरगुती, व्यावसायिक व औद्योगिक ग्राहकांसाठी ही योजना आहे. थकित बिलांच्या योजनेत कृषी ग्राहकांचा समावेश नाही. योजनेचा कालावधी १ सप्टेंबर ते ३० नोव्हेंबर २०२४ आहे.
▪️सहा हप्त्यात थकबाकी भरता येणार..
• या योजनेत मुद्दल बिलाच्या ३० टक्के रक्कम भरून ऊर्वरित ७० टक्के रक्कम सहा हफ्त्यात भरायची सोय आहे.
• जे घरगुती, व्यावसायिक इत्यादी लघुदाब ग्राहक एक रकमी थकित बिल भरतील त्यांना दहा टक्के सवलत देण्यात येईल.
• उच्चदाब औद्योगिक व व्यावसायिक ग्राहकांना पाच टक्के सवलत मिळेल.
▪️असा लाभ घेता येणार ..
संबंधित वीज ग्राहकांना www.mahadiscom.in/wss/wss या वेबसाईटवरून ऑनलाईन पद्धतीने अभय योजनेचा लाभ घेता येईल. महावितरणच्या मोबाईल ॲपवरून योजनेचा लाभ घेता येईल. वीज ग्राहक १९१२ किंवा १८००२३३३४३५ किंवा १८००२१२३४३५ या टोल फ्री क्रमांकावर फोन करूनही माहिती घेऊ शकतात. योजनेनुसार पैसे भरल्यानंतर संबंधित वीज ग्राहकाला पुन्हा एकदा नियमित वीज कनेक्शन घेता येईल. त्याच पत्त्यावर नियमानुसार कागदपत्रे सादर करून नव्या नावाने वीज कनेक्शन घेण्याचीही सुविधा असेल.
