spot_img
spot_img

BREAKING! मलकापूरच्या व्हि. बी. कोलते इंजिनिअरिंग कॉलेजचा बेपत्ता विद्यार्थी मृतावस्थेत; समाधानच्या मृत्यूचे कारण अद्याप अस्पष्ट!

मलकापूर (हॅलो बुलढाणा/करन झनके) झेरॉक्स आणण्यासाठी जात असल्याचे सांगून खोलीबाहेर पडलेल्या अभियांत्रिकीच्या विद्यार्थ्याचा दुसऱ्या दिवशी मृतदेह आढळल्याची घटना रविवारी, २२ नोव्हेंबर रोजी सायंकाळी पाच वाजण्याच्या सुमारास उघडकीस आली. समाधान सुनील म्हस्के, रा. पांढरदेव, ता. चिखली, असे मृत विद्यार्थ्याचे नाव आहे. धरणगाव परिसरात त्याने आत्महत्या केल्याची प्राथमिक माहिती समोर आली आहे. मृत्यूमागील कारण अद्याप स्पष्ट झालेले नाही.

समाधान मलकापूर येथील व्हि. बी. कोलते इंजिनिअरिंग कॉलेजमध्ये द्वितीय सत्रात शिक्षण घेत होता. मलकापूर ग्रामीण ग्रामपंचायत हद्दीतील गजानन नगरीत तो मित्रांसोबत भाड्याच्या खोलीत राहत होता.

शनिवारी सायंकाळी पाचच्या सुमारास वर्गमित्राची दुचाकी घेऊन तो खोलीबाहेर पडला. रात्री दहा वाजेपर्यंत परत न आल्याने मित्रांनी त्याच्या आईवडिलांना माहिती दिली. त्यानंतर सहकाऱ्यांनी आणि मित्रांनी रात्रभर विविध ठिकाणी शोध घेतला; मात्र समाधानचा ठावठिकाणा लागला नाही.

रविवारी सकाळी वडील सुनील म्हस्के आणि त्याचे मामा मलकापुरात पोहोचले. कॉलेज परिसरासह शहरातील सीसीटीव्ही चित्रण तपासण्यात आले. त्यात समाधान शनिवारी सायंकाळी कॉलेजसमोरून धरणगावच्या दिशेने जाताना दिसला. त्यानुसार शोध घेताना धरणगाव परिसरात त्याने नेलेली दुचाकी आढळली. जवळच्या शेतात पाहणी केल्यानंतर त्याचा मृतदेह सापडला.

शहर पोलीस उपनिरीक्षक सतीश बेले यांनी घटनास्थळी पंचनामा केला. मृतदेह उपजिल्हा रुग्णालयात नेण्यात आला. पंचनाम्यानंतर शवविच्छेदन करण्यात आले.

घटनेची माहिती मिळताच माजी नगराध्यक्ष ॲड. हरीश रावळ, शिवसेना उपजिल्हाप्रमुख गजानन ठोसर, कॉलेजचे प्राचार्य अनिल खर्चे, युगेश खर्चे आणि माजी नगरसेवक गजानन सोनोने रुग्णालयात पोहोचले.

मित्रांनी रात्रभर शोध घेतल्यानंतर सकाळी कुटुंबीयही शोधात सहभागी झाले होते. सीसीटीव्हीतील चित्रणामुळे त्याच्या प्रवासाची दिशा समजली; मात्र शोधाचा शेवट दुर्दैवी ठरला. या मृत्यूमागील परिस्थितीबाबत अधिकृत माहिती समोर येणे बाकी आहे. पोलिसांच्या अधिकृत निष्कर्षाची प्रतीक्षा आहे.

spot_img

Related Articles

लोकप्रिय

error: Content is protected !!