जळगाव जामोद (हॅलो बुलढाणा/ज्ञानदेव राजनकर) पोटात भाला खुपसलेल्या अवस्थेत सापडलेल्या गाईची उपचारादरम्यान प्राणज्योत मालवली; आता या मुक्या जीवाच्या मृत्यूला जबाबदार असणारा आरोपी सापडणार कधी? वडगाव गड येथील अमानुष घटनेचे वृत्त ‘हॅलो बुलढाणा’ने प्रसारित केल्यानंतर शिवसेना (उद्धव बाळासाहेब ठाकरे) पक्षाचे जिल्हाप्रमुख गजानन वाघ यांनी तीव्र संताप व्यक्त केला आहे. अज्ञात आरोपीचा तातडीने शोध घेऊन २४ तासांच्या आत त्याला जेरबंद करण्याची मागणी त्यांनी केली आहे.
५ ऑक्टोबर रोजी वडगाव गड येथील अहमद शहा यांच्या वाड्याजवळ गाईच्या पोटात भाला खुपसलेला असल्याची माहिती समोर आली. गावात ग्रामसभा सुरू असताना अनंता गोपाल सरदार यांना सुदाम टापरे यांचा फोन आला. माहिती मिळताच सरदार यांनी मिलन माळवनकर आणि गोविंद काटोळे यांच्यासह घटनास्थळी धाव घेतली. तेथे दिसलेले दृश्य काळीज पिळवटणारे होते. गाईच्या पोटात भाला खुपसलेला असल्याचे फिर्यादीने तक्रारीत नमूद केले आहे.
घटनेची माहिती पोलिसांना देण्यात आली. सरदार यांच्या तक्रारीवरून जळगाव जामोद पोलीस ठाण्यात अज्ञात आरोपीविरुद्ध भारतीय न्याय संहितेच्या कलम ३२५ अंतर्गत गुन्हा क्रमांक ६३१/२०२६ दाखल झाला आहे. पोलीस उपनिरीक्षक खाडे पुढील तपास करीत आहेत. दरम्यान, गंभीर जखमी गाईचा उपचारादरम्यान मृत्यू झाल्याच्या माहितीनंतर ग्रामस्थांचा संताप आणखी तीव्र झाला आहे.
मुक्या जीवावर भाला चालवणाऱ्याला कोणत्याही परिस्थितीत सोडू नका! प्रकरणाचा सखोल तपास करून दोषीवर कठोर कायदेशीर कारवाई करावी, अशी वाघ यांची मागणी आहे. फिर्यादी आणि ग्रामस्थांनी महाराष्ट्र प्राणी संरक्षण तथा गोहत्या बंदीच्या लागू तरतुदींनुसारही गुन्हा दाखल करण्याची मागणी केली आहे.
गाईवर हल्ला कोणी केला? त्यामागचे कारण काय? आरोपीचा शोध घेण्यात पोलिसांना यश कधी मिळणार? हे प्रश्न अद्याप अनुत्तरित आहेत. ‘हॅलो बुलढाणा’ने समोर आणलेल्या या क्रूरतेच्या प्रकरणात आता तपासाला गती आणि ठोस कारवाईची गरज आहे. मुक्या जीवाला न्याय देण्याची जबाबदारी घोषणांनी नव्हे, आरोपीचा शोध घेऊन आणि पुराव्यांवर आधारित कारवाईतून पार पाडावी लागणार आहे!
Total Users : 3570769