spot_img
spot_img

BIG BREAKING! शेतकरी थेंब जपतोय, अन् बुलढाण्याच्या हॉस्पिटल लाईनला ‘पूर’… पाइप फुटला, मग चार तास पालिकेला पाणी का थांबवता आलं नाही?

बुलढाणा (हॅलो बुलढाणा) शेतात पाण्याचा एकेक थेंब जपावा लागतोय, अन् बुलढाणा शहरात हजारो लिटर पाणी रस्त्यावरून वाहून गेलं! हॉस्पिटल लाईन परिसरात जलवाहिनी फुटल्याने तब्बल चार तास रस्त्यावरून पुरासारखे पाणी वाहत राहिले. रस्त्यावर पाणी साचल्याने नागरिकांची ये-जा अडली. दुष्काळाचं सावट असताना पाण्याचा प्रवाह थांबवण्यासाठी एवढा वेळ का लागला, असा सवाल आता नगरपालिकेला विचारला जात आहे.

धरणातील पाणीसाठा घटत असताना आगामी उन्हाळ्यात शहराला पुरेसं पाणी मिळेल का, याची चिंता आहे. अशा वेळी मुख्य प्रश्न दुरुस्तीला किती वेळ लागतो एवढाच नाही. गळतीची माहिती पाणीपुरवठा विभागाला नेमकी किती वाजता मिळाली? ती मिळाल्यानंतर संबंधित भागाचा पाणीपुरवठा बंद करण्यासाठी कोणती पावलं उचलली? चार तासांत किती पाणी वाया गेलं, याची नोंद पालिका घेणार का?

जलवाहिनी फुटली कशाने? चौकशीची जबाबदारी कोण घेणार?

जलवाहिनी जुनी होती, पाण्याचा दाब वाढला होता की अन्य तांत्रिक बिघाड झाला, हे तपासणीतून स्पष्ट व्हायला हवं. या वाहिनीची शेवटची पाहणी कधी झाली आणि दुरुस्तीची गरज यापूर्वी नोंदवली होती का, याचाही तपशील पालिकेने जाहीर करावा. चौकशीत निष्काळजीपणा आढळल्यास संबंधितांची जबाबदारी निश्चित करून कारवाई होणार का, हाही प्रश्न आहे.

गळती तातडीने थांबवून जलवाहिनी दुरुस्त करावी आणि साचलेलं पाणी कमी करून रस्ता मोकळा करावा, अशी नागरिकांची अपेक्षा आहे. शहरातील जुन्या जलवाहिन्यांची पाहणी करून गळतीची माहिती मिळताच पाणीपुरवठा बंद करण्याची यंत्रणा किती वेळात कामाला लागेल, हेही पालिकेने स्पष्ट करावं. टंचाई आली की नागरिकांना पाणी जपून वापरायला सांगितलं जातं. मग आज रस्त्यावरून वाहिलेल्या पाण्याचा हिशेब पालिका कधी देणार?

spot_img

Related Articles

लोकप्रिय

error: Content is protected !!