जानेफळ (हॅलो बुलडाणा/अनिल राठोड) जानेफळ पासून तीन ते चार किलोमीटर अंतरावर असलेल्या पारडी या गावात ग्रामपंचायतची इमारत नसल्याने येथील कामकाज घुटी गावातील करमणूक केंद्रामध्ये ग्रामपंचायत भरून केली जात असल्याने ग्रामस्थांना नाहक त्रास सोसावा लागत आहे. परिणामी पारडी येथे ग्रामपंचायतची इमारत उभारण्यात येण्याची मागणी जोर धरू लागली आहे.
पारडी गावाची लोकसंख्या दीड हजार तर घुटी गावाची लोकसंख्या आठशे आहे.
घूटी येथे ग्रामपंचायत कार्यालयाची इमारत उभारण्याची परवानगी दिली आहे. मात्र पारडी येथे जागा उपलब्ध असून सुद्धा ग्रामपंचायतीला स्वत:ची इमारतच नाही. त्यामुळे अशा ग्रामपंचायतीचा कारभार सरपंचांच्या घरून किंवा घूटीच्या करमणूक केंद्रातून चालतो. त्यामुळे विकास कामे खोळंबली आहेत. ग्रामपंचायतीला स्वत:ची इमारत नसल्यामुळे विकास कामांना मोठ्या प्रमाणात ब्रेक लागला आहे. सर्वसामान्य नागरिकांना आपल्या कामासाठी अथवा एखाद्या दाखल्यासाठी भटकावे लागत आहे.केंद्रीय आरोग्य मंत्री व तीन वेळा आमदार असलेल्या मतदार संघात या गंभीर प्रश्नाकडे जिल्ह्यातील लोकप्रतिनिधी व अधिकाऱ्यांचे पूर्णपणे दुर्लक्ष आहे. ग्रामपंचायतीचे पदाधिकारीसुद्धा या बाबत उदासीन दिसून येतात.आता तरी पारडी येथे ग्रामपंचायत ची इमारत उभारण्यात यावी अशी मागणी ग्रामस्थांनी केली आहे.
