सिंदखेडराजा (हॅलो बुलढाणा / वसीम शेख) दुष्काळाचे चटके, पिकांचे नुकसान अन् डोक्यावर कर्जाचा डोंगर! आर्थिक संकटाशी दोन हात करणाऱ्या मलकापूर पांग्रा परिसरातील शेतकऱ्यांसाठी दिलाशाची बातमी समोर आली आहे. अहिल्याबाई होळकर कर्जमाफी योजनेची चौथी यादी उद्या, बुधवार, १४ ऑक्टोबर रोजी भारतीय स्टेट बँकेच्या मलकापूर पांग्रा शाखेसमोर प्रसिद्ध करण्यात येणार आहे. या यादीत बँकेच्या १,०११ खातेदार शेतकऱ्यांचा समावेश असल्याची माहिती देण्यात आली आहे.
परिसरात पावसाअभावी शेतीचे गणित पुरते कोलमडले आहे. सोयाबीन, कपाशीसह इतर पिकांना फटका बसल्याने उत्पादनाची अपेक्षा धुळीस मिळाली आहे. बियाणे, खते, फवारणी आणि मशागतीवर खर्च केलेला पैसा वसूल होणार कसा, हा प्रश्न शेतकऱ्यांसमोर उभा आहे. हातात उत्पन्न नाही आणि मागील कर्जाचा भार कायम; अशा परिस्थितीत पुढील हंगामासाठी भांडवल उभे करण्याची चिंता वाढली आहे.
नुकसान शेतकऱ्यांचे, कर्जाचा भारही शेतकऱ्यांवरच! या आर्थिक कोंडीत कर्जमाफीची प्रक्रिया पुढे सरकणे शेतकऱ्यांसाठी महत्त्वाचे ठरणार आहे. चौथी यादी प्रसिद्ध झाल्यानंतर संबंधित खातेदारांना त्यामध्ये आपले नाव तपासता येणार आहे. मात्र, यादीत नाव असल्याची खात्री करण्यासोबत आवश्यक आधार प्रमाणीकरण पूर्ण करणेही गरजेचे आहे.
भारतीय स्टेट बँकेच्या मलकापूर पांग्रा शाखेच्या वतीने पात्र शेतकऱ्यांना यादी तपासून आधार प्रमाणीकरण करून घेण्याचे आवाहन करण्यात आले आहे. त्यामुळे संबंधित खातेदारांनी उद्या शाखेसमोरील यादी पाहावी आणि पुढील प्रक्रियेबाबत बँकेकडून माहिती घ्यावी.
यादीतील नोंदी किंवा प्रमाणीकरणाबाबत काही शंका असल्यास शाखेतच स्पष्टता करून घेणे शेतकऱ्यांसाठी उपयुक्त ठरेल. लाभाच्या प्रतीक्षेत असलेल्या खातेदारांनी आवश्यक प्रक्रिया वेळेत पूर्ण करावी, असे आवाहन करण्यात आले आहे.
दुष्काळाने हिरावलेली जगण्याची उमेद पुन्हा उभी करण्यासाठी शेतकऱ्यांना ठोस आर्थिक आधाराची गरज आहे. कर्जमाफीच्या माध्यमातून तो दिलासा मिळण्याची अपेक्षा आता वाढली आहे. उद्या यादी लागणार; आपल्या नावाची खात्री करा आणि आवश्यक प्रक्रिया पूर्ण करा!
Total Users : 3605287