जळगाव जामोद (हॅलो बुलढाणा / ज्ञानदेव राजनकर) पारंपरिक गणवेशातील स्वयंसेवकांची एकसमान पावले, संचलनातील काटेकोर शिस्त अन् मार्गावर नागरिकांकडून होणारी पुष्पवृष्टी! जळगाव जामोद शहरात शनिवार, दि. ३१ ऑक्टोबर रोजी राष्ट्रीय स्वयंसेवक संघाच्या नगर शाखेने काढलेले पथसंचलन लक्षवेधक ठरले. विजयादशमी उत्सव आणि संघाच्या शताब्दीनिमित्त आयोजित संचलनातून संघटनशक्तीचे दर्शन घडले.
श्रीपाद कृष्ण कोल्हटकर महाविद्यालयाच्या प्रांगणातून सायंकाळी पाच वाजता संचलनाला प्रारंभ झाला. स्वयंसेवकांनी शिस्तबद्ध वाटचाल करत शहरातील प्रमुख मार्गांवरून मार्गक्रमण केले. एकसारखी पावले आणि संचलनातील एकरूपतेने नागरिकांचे लक्ष वेधले.
दुर्गा चौक, चौभारा, अयोध्या नगर, रूपलाल नगर, मानाजी चौक, बाजार रोड, बालाजी चौक, डॉ. आंबेडकर विद्यालय, आंबेडकर चौक आणि तहसील चौकातून संचलन पुन्हा महाविद्यालयाच्या प्रांगणात दाखल झाले. शहरातील विविध भागांत स्वागताची तयारी करण्यात आली होती. ठिकठिकाणी उभारलेल्या स्वागत कमानी, आकर्षक रांगोळ्या आणि पुष्पवृष्टीने संचलन मार्गाला उत्सवी स्वरूप आले. स्वयंसेवकांच्या स्वागतासाठी नागरिकांनी दाखविलेला उत्साहही लक्षवेधक ठरला. संचलनातील शिस्तीइतकीच मार्गावरील स्वागताची सजावट नागरिकांचे लक्ष वेधून घेत होती. प्रमुख चौकांमध्ये काढलेल्या रांगोळ्यांनी स्वागताला रंगत आणली. संपूर्ण संचलनात स्वयंसेवकांची एकरूपता आणि सामूहिक सहभाग ठळकपणे दिसून आला. महाविद्यालयातून सुरू झालेला हा प्रवास शहरातील विविध वस्त्या आणि चौकांना जोडत पुन्हा त्याच प्रांगणात विसावला.
कायदा व सुव्यवस्थेसाठी जिल्हा पोलीस अधीक्षक निलेश तांबे यांच्या मार्गदर्शनाखाली उपविभागीय पोलीस अधिकारी सोहम मच्छरे आणि पोलीस निरीक्षक सचिन बागुल यांच्या नेतृत्वात बंदोबस्ताचे नियोजन करण्यात आले होते. सहाय्यक पोलीस निरीक्षक गणेश कायंदे, अमोल पंडित, स्नेहा शेडगे, नागेश मोहोळ, सचिन राजपूत, निलेश पुंडे, बाळकृष्ण पवार यांच्यासह पोलीस कर्मचारी तैनात होते
Total Users : 3698813