💥EXCLUSIVE! शिक्षकांचे दुर्लक्ष? भादोला शाळेत 11 विद्यार्थ्यांचे हातावर ब्लेडने वार!

भादोला (हॅलो बुलडाणा) जिल्हा परिषद उच्च प्राथमिक शाळेत धक्कादायक प्रकार समोर आला आहे. पाचवीतील 11 विद्यार्थ्यांनी हातावर ब्लेडने जखमा करून घेतल्याने पालकांमध्ये संतापाची लाट उसळली आहे. या शाळेत एकूण 11 शिक्षक असून विद्यार्थ्यांकडे सतत दुर्लक्ष होत असल्याचा आरोप पालकांनी केला आहे.पालकांनी शिक्षण अधिकाऱ्यांकडे वारंवार तक्रारी करूनही कोणतीही कारवाई झाली नाही. संतप्त पालकांनी मुलांना शाळेत पाठविण्यास नकार देत शाळा बंद आंदोलन पुकारले. मात्र, मुजोर शिक्षकांना याचा कोणताही परिणाम झाला नाही. अखेर पालकांनी पत्रकारांकडे धाव घेत अन्यायाविरोधात आवाज उठवला.

प्रत्यक्ष चौकशीत धक्कादायक बाबी समोर आल्या. शिक्षक विद्यार्थ्यांना शिकवत नसून अनेकांना स्वतःचे नावही लिहिता-वाचता येत नाही. शाळा व्यवस्थापन समितीने यावर ठोस आरोप केले आहेत. केंद्रप्रमुख, विस्तार अधिकारी आणि गटशिक्षणाधिकारी यांनी कधीही शाळेला भेट दिली नसल्याचे समोर आले. विद्यार्थ्यांनी हा प्रकार खेळताना केल्याचे सांगण्यात आले, मात्र शिक्षकांच्या बेफिकिरीमुळेच हा प्रकार घडल्याचे स्पष्ट झाले आहे.मुख्याध्यापकांनी काही शिक्षकांना कारणे दाखवा नोटीस बजावल्या आहेत. शिक्षणाधिकारी खरात यांनी तत्काळ कारवाई करत शेख या शिक्षकाला निलंबित केले असून गणित-विज्ञान शिक्षक जठाळ सर यांची बदली करण्यात आली आहे.

मानसोपचार तज्ज्ञांच्या मते, हा प्रकार मुलांमध्ये वाढत्या मानसिक असंतुलनाचा परिणाम असून, वेळीच समुपदेशन न झाल्यास भविष्यात गंभीर गुन्हेगारी प्रवृत्ती वाढण्याची भीती व्यक्त करण्यात आली आहे. आता प्रशासन जागे होणार का? पालकांना न्याय मिळणार का? हा प्रश्न अनुत्तरित आहे!