बुलढाणा (हॅलो बुलढाणा) साता समुद्रा पार गेलेल्या मायमराठीला जपण्या-जोपासण्याचे आपले कर्तव्य आहे. त्यामुळे उर्दू भाषिक शाळांमधील अभ्यासक्रमात मराठी या विषयाचा शंभर टक्के समावेश करावा, अशी मागणी अलमदिना एज्युकेशन फाउंडेशनचे अध्यक्ष नदीम शेख यांनी जिल्हाधिकारी यांच्याकडे एका निवेदनाद्वारे आज केली आहे.
नदिम शेख यांनी दिलेल्या निवेदनात म्हटले आहे की, जिल्ह्यातील ईयत्ता पहिली ते बारावी पर्यंतच्या सर्व उर्दु भाषिक शाळांमध्ये शंभर टक्के मराठी विषयाचा समावेश करण्यात यावा.मुस्लिम समाजाची मातृभाषा उर्दु आहे. म्हणुन उर्दु भाषिक शाळांमध्ये पहिली ते कनिष्ठ महाविद्यालय पर्यंतच्या प्रत्येक वर्गात
मुस्लिम समाजाच्या विद्यार्थ्यांना आवर्जुन उर्दु भाषेचा विषय असतो. या सोबत इंग्रजी, हिंदी किंवा अरबी या भाषेचा देखील
विषय असतो. महाराष्ट्र राज्यातील राहणाऱ्या प्रत्येक व्यक्तिला मराठी भाषा बोलणे, लिहिणे आणि वाचता येणे आवश्यक आहे. अशातच उर्दु भाषिक शाळांमध्ये शंभर टक्के मराठी भाषिक विषय नसल्या कारणाने मुस्लिम समाजातील विद्यार्थ्यांना उच्च शिक्षणाच्या वेळेस मोठी अडचण निर्माण होते. नोकरभरतीसह प्रत्येक शासकीय कामांसाठी मराठी भाषेचा वापर होतो, तेव्हा मुस्लिम विद्यार्थ्यांना नैराश्याचा सामना करावा लागतो.
त्यामुळे जिल्ह्यातील पहिली ते बारावी पर्यंतच्या सर्व उर्दु
भाषिक शाळांमध्ये हिंदी किंवा अरबी भाषिक विषय रद्द करून तात्काळ शंभर टक्के मराठी भाषा विषयाचा अभ्यासक्रमात
समावेश करण्यात यावा अशा आशयाचे निवेदन जिल्हाधिकारी व संबंधित मंत्री महोदयांना देण्यात आले आहे.
उर्दू शाळेतील अभ्यासक्रमात मायमराठीला स्थान द्या!-नदीम शेख यांची जिल्हाधिकाऱ्यांकडे मागणी
