💥उध्वस्त! ब्रिटिशकालीन न.प.उर्दू शाळेची इमारत जमीनदोस्त!

बुलढाणा (हॅलो बुलडाणा) शिक्षणाच्या माध्यमाने अनेकांचे भविष्य घडविणारी बुलढाणा येथील जयस्तंभ चौकातील नगरपालिकेची उर्दू शाळा क्रमांक 1 ही ब्रिटिशकालीन इमारत आता जमिनदोस्त करण्याचे काम सुरू झाले आहे.

अजिंठा पर्वतरांगेवर वसलेले थंड हवेचे ठिकाण असल्याने बुलढाणा शहराला इंग्रजांनी जिल्हा मुख्यालय म्हणून घोषित केले होते.आजही बुलढाणा शहरात अनेक ब्रिटिशकालीन वास्तू पाहायला मिळत आहे. त्या काळात शहरातील मुख्य चौक म्हणून ओळख असलेल्या जयस्तंभ चौकात स्वातंत्र्यपूर्वी म्हणजेच 1908 पूर्वी प्रशस्त एक मजली इमारत बांधून त्यात उर्दू शाळा सुरू करण्यात आली होती. मजबूत बांधकाम असलेली या इमारतीत पहिली ते चौथीपर्यंत उर्दू शाळा सुरू करण्यात आली होती. स्वातंत्र्यानंतर याच इमारत मध्ये नगरपालिकेची मराठी शाळा क्रमांक 3 सुरू करण्यात आली. या एकच इमारतीत नगरपालिकेच्या उर्दू आणि मराठी शाळेत अनेकांनी शिक्षणाचे धडे घेतले.जवळपास 116 वर्ष झाल्याने ही इमारत आता जर्जर झालेली आहे.या ठिकाणी नवीन इमारत उभारण्यासाठी शासनाकडून मंजुरी मिळाली असून ब्रिटिशकालीन ही इमारत धाराशाही करण्यात येत आहे,अशी माहिती उर्दू शाळेचे मुख्याध्यापक मो. अजीम यांनी दिली आहे.