चिखली (हॅलो बुलडाणा/ सय्यद साहिल) इस्लाम धर्माचे प्रेषित मुहम्मद सल्लल्लाहू अलैही वसल्लम यांच्या जयंतीनिमित्त चिखली शहरात आयोजित महा रक्तदान शिबिर यशस्वीपणे संपन्न झाले. सामाजिक सलोखा आणि एकतेचे प्रतीक असलेल्या या शिबिराने हिंदू-मुस्लिम बांधव आणि विशेषतः मुस्लिम महिलांच्या उत्स्फूर्त सहभागामुळे बुलढाणा जिल्ह्यातील इतर शिबिरांपेक्षा एक वेगळी ओळख निर्माण केली.
मानवता आणि शांतीप्रेषित मुहम्मद (स.अ.व.) यांनी आपले संपूर्ण आयुष्य मानवजातीच्या कल्याणासाठी समर्पित केले. त्यांनी शांती, सद्भावना आणि परस्पर सहकार्याचा संदेश दिला, जो जाती-धर्माच्या पलीकडे जाऊन सर्वांसाठी मानवतेची सेवा करण्याचे आवाहन करतो. इस्लाम धर्म हा शांती आणि एकतेचा मार्ग दाखवतो, जिथे एका ईश्वर अल्लाहची उपासना केली जाते. प्रेषितांच्या या विचारांना अनुसरून चिखली शहरात महा रक्तदान शिबिराचे आयोजन करण्यात आले, ज्याला सर्वधर्मीयांनी उत्साहाने प्रतिसाद दिला.
रक्त हे कृत्रिमरित्या निर्माण करता येत नाही, आणि केवळ मानवापासूनच मिळवता येते. रक्तदानामुळे अनेकांचे प्राण वाचतात, यामुळे रक्तदानाला सर्वोच्च दान मानले जाते. प्रेषितांच्या मानवतावादी संदेशाला प्रत्यक्षात आणण्यासाठी या शिबिरात रक्तदानाच्या माध्यमातून सामाजिक बांधिलकी जोपासण्यात आली.
चिखली शहरात नेहमीच सामाजिक सलोखा आणि बंधुभावाचे उदाहरण पहावयास मिळते. या रक्तदान शिबिरात हिंदू बांधवांनी मोठ्या संख्येने सहभाग घेऊन रक्तदान केले, ज्यामुळे सर्वधर्मीय एकतेचा संदेश अधिक दृढ झाला. विशेष बाब म्हणजे, मुस्लिम महिलांनी देखील मोठ्या प्रमाणात रक्तदान करून या शिबिराला वेगळे महत्व प्राप्त करून दिले. त्यांच्या या सहभागामुळे हे शिबिर बुलढाणा जिल्ह्यातील इतर शिबिरांपेक्षा वेगळे ठरले.
चिखली शहरात चार ठिकाणी या भव्य महा रक्तदान शिबिराचे आयोजन करण्यात आले होते. हज़रत खैरुल्लाह शाह बाबा दर्गा हॉल, संत सावता माळी भवन चिंच परिसर, ग्रामीण रुग्णालय इंदिरा नगर व नूर चौक नगर परिषद येथील या शिबिरांना नागरिकांचा प्रचंड प्रतिसाद मिळाला. चिखली येथील महा रक्तदान शिबीरात लिलावती ब्लड बँक बुलढाणा, लोकमान्य ब्लड बँक संभाजी नगर, जिवनधारा ब्लड बँक बुलढाणा, अमृता ब्लड बँक संभाजी नगर, ग्रमिण रुग्णालय ब्लड बँक खामगांव यांनी आपल्या रक्पेढीत रक्त जमा केले. संध्याकाळी 5:30 वाजेपर्यंत या महा रक्तदान शिबीरात 1000 पेक्षा जास्त रक्तदात्यांनी रक्तदान केले. संध्याकाळी रक्तदान करणारे रक्तदान शिबीराकडे येत असल्याचे चित्र दिसत होते. बुलढाणा जिल्ह्यातील चिखली शहरात होणारे हे रक्तदान शिबिर सर्वात मोठे आणि सर्वाधिक रक्त संकलन करणारे शिबिर म्हणून ओळखले जाते.
या शिबिराच्या यशस्वी आयोजनासाठी चिखलीतील सर्व मुस्लिम बांधवांनी पुढाकार घेतला होता. शिबिराला जिल्हा पोलीस अधिक्षक बुलढाणा, जिल्हा शल्य चिकीत्सक बुलढाणा व अनेक मान्यवरांनी भेटी देऊन आयोजकांचे आणि रक्तदात्यांचे कौतुक केले. विशेषतः हिंदू-मुस्लिम बांधव आणि मुस्लिम महिलांच्या सहभागाने या उपक्रमाला सामाजिक एकतेचे प्रतीक बनवले.
चिखलीतील हे रक्तदान शिबिर इस्लाम धर्माचे प्रेषित मोहम्मद (स.अ.व.) यांच्या मानवतावादी विचारांचे आणि इस्लामच्या शांतीप्रिय संदेशाचे प्रतीक ठरले. हिंदू-मुस्लिम बांधवांचा सहभाग आणि विशेषतः मुस्लिम महिलांचा सक्रिय योगदान यामुळे हे शिबिर सामाजिक सलोख्याचा आणि एकतेचा अनोखा संगम ठरला. अशा उपक्रमांमुळे चिखली शहर सामाजिक कार्यात एक आदर्श निर्माण करत आहे.
चिखली शहरात प्रेषित मोहम्मद (स.अ.व.) जयंतीनिमित्त भव्य महारक्तदान शिबिर संपन्न हिंदु मुस्लीम ऐकता व सामाजिक सलोख्याचा अनोखा संगम महारक्तदान शिबीरात 1000 रक्तदानाचा टप्पा पार
