चिखली (हॅलो बुलडाणा/ सय्यद साहिल) चिखली तालुक्यातील मलगी गावात काल रात्री भीषण दुर्घटना घडली. अंगणवाडी मदतनीस असलेल्या शोभाबाई रमेश परिहार यांच्या घरात गॅस सिलिंडरचा स्फोट होऊन घर उद्ध्वस्त झाले. या भीषण स्फोटात शोभाबाई व त्यांचा २४ वर्षीय मुलगा राजेश परिहार गंभीररित्या भाजल्याने ग्रामस्थांत भीतीचे वातावरण पसरले आहे. (दि. २६ ऑगस्ट) रोजी रात्री साडेआठच्या सुमारास ही घटना घडली. स्वयंपाक करत असताना अचानक सिलिंडरचा मोठा स्फोट झाला. अवघ्या क्षणात स्वयंपाकघरात ज्वाळा उसळल्या आणि आई–मुलगा त्यात सापडले. स्फोटाचा आवाज एवढा प्रचंड होता की गावकऱ्यांनी घराबाहेर धाव घेतली. घटनेत शोभाबाईंच्या अंगावरील साडी जळून खाक झाली असून हाताला गंभीर भाजल्या आहेत तसेच केस जळाले आहेत. मुलगा राजेशच्या पायालाही गंभीर भाजल्या आहेत.
गावकऱ्यांनी तात्काळ धाडस दाखवत जखमींना बाहेर काढले व पुढील उपचारासाठी संभाजीनगर येथील घाटी रुग्णालयात हलवले. जखमींची प्रकृती चिंताजनक असल्याचे डॉक्टरांनी सांगितले. या दुर्घटनेनंतर परिसरात भीतीचे व दहशतीचे वातावरण निर्माण झाले आहे.
दरम्यान, स्फोटानंतर गावात मोठी गर्दी जमली. नगरपरिषद चिखलीचे अग्निशमन दल तात्काळ घटनास्थळी दाखल झाले व आगीवर नियंत्रण मिळवले. चिखली पोलिसही घटनास्थळी धाव घेऊन पंचनामा केला. तंटामुक्ती अध्यक्ष श्रीकांत राऊत, सरपंच विनायक साप्ते व दिलीप शितोळे यांनी घटनास्थळी भेट देऊन परिस्थितीची माहिती घेतली.
