बुलढाणा (हॅलो बुलडाणा) गत वर्षी समाज कल्याण विभाग, बुलढाणा अंतर्गत दिव्यांग विभागातून बदली झालेल्या व हल्ली जिल्हा दिव्यांग सक्षमीकरण अधिकारी म्हणून प्रिंप्राळा,जळगाव येथे कार्यरत असलेल्या माधूरी भागवत ह्या 5 हजाराची लाच घेताना नाशिक येथील एसीबीच्या जाळ्यात अडकल्या आहेत. त्यामुळे शासकीय कार्यालयातील खाबुगिरी चव्हाट्यावर आली आहे.
या घटनेतील तक्रारदार हे भौतिक उपचार तज्ञ तथा प्रभारी अधिक्षक वर्ग २ या पदावर शासकिय दिव्यांग समिश्र केंद्र, जळगांव या कार्यालयात कार्यरत आहेत.
ते १४ जुलै रोजी पगार बिलाच्या कामासंदर्भात जिल्हा दिव्यांग विभाग, जिल्हा परीषद कार्यालय, जळगांव येथे गेले होते. त्यांनी श्रीमती माधुरी भागवत, जिल्हा दिव्यांग सक्षमीकरण अधिकारी यांची भेट घेतली. त्यावेळी तक्रारदार यांचे जुन २०२५ पगार बीलामध्ये काहीही त्रुटी न काढता पगार बीलाबर सह्या करून ते पुढे जिल्हा समाजकल्याण अधिकारी यांच्याकडे पाठवण्याच्या मोबदल्यात तक्रारदार यांच्याकडे १२,००० रू. लाचेची मागणी केली. तक्रारदार यांना लाच देण्याची इच्छा नसल्याने त्यांनी २२ जुलै रोजी मिक्सर प्रतिबंधक विभाग जळगाव यांचेकडे लेखी तक्रार दिली होती.
सदर तक्रारीप्रमाणे दिनांक २२ जुलै रोजी लाच पडताळणी केली असता,यातील श्रीमती माधुरी भागवत यांनी १०,००० रु. लाचेची मागणी करून, तडजोडी अंती प्रथम हफ्ता म्हणून ५,००० रुपये व उर्वरित ५,००० रुपये रक्कम इतर बिले निघाल्यावर दया, अशी पंचासमक्ष लाचेची मागणी केल्याचे निष्पन्न झाले. २४ जुलै रोजी श्रीमती माधुरी भागवत यांनी तक्रारदार यांचेकडून ५,००० रूपयांच्या लाचेची रक्कम स्वतः पंचासमक्ष स्वीकारली. ही कारवाई जळगाव व नाशिक एसीबी पथकाने केली आहे. या प्रकरणी जळगाव पोलीस ठाण्यात गुन्हा दाखल करण्याची प्रक्रिया सुरू आहे.
